Qaydalar

“Ulduzlar Həvəskar Futbol Liqası” turnirinin

ƏSASNAMƏSİ

1. Əsas müddəalar

      Bu qaydalar “Ulduzlar Həvəskar Futbol Liqası” turnirində (bundan sonra “Turnir”) iştirak edən komandaların və təşkilinə cəlb olunmuş digər üzvlərin hüquqlarını, vəzifələrini və məsuliyyətini müəyyən edir.

2. Məqsəd və vəzifələr

      Turnir aşağıdakı məqsədlər üçün keçirilir:

·         Gənclər arasında futbolun təbliği və kütləviliyinin artırılması;

·         Gənc futbolçuların ustalığının yüksəldilməsi;

·         Gənclərin idmana marağının artırılması və pis vərdişlərdən uzaqlaşdırılması;

·         Turnirin qalibini və komandaların yekunda tutduqları yerləri müəyyən etmək.

3. Yarışlara rəhbərlik

      Turnir fiziki şəxs, 15.10.2015-ci il tarixdə ASAN-GƏNCƏ tərəfindən verilmiş AZE seriyalı 15****** nömrəli şəxsiyyət vəsiqəsinin sahibi Anar Əli oğlu Məmmədovun (bundan sonra “Təşkilatçı”) Təşkilatçılığı, AFFA-nın dəstəyi ilə keçirilir.

4. İştirakçıların müəyyən olunması

        Turnirdə Bakı şəhəri, qəsəbə və kəndlərindən toplanmış 20 (iyirmi) həvəskar komanda iştirak edəcək:  “Xilə”, “Kia Fan Club”, “Əmirli Tovuz”, “Maskovski”, “Galaxy”, “Füzuli”, “King Wood”, “Old Boys”, “Lion Sumqayıt”, “Lankon By Lankonçay”, “Maştağa”, “Ərgünəş Füzuli”, “Qocalar”, “Galacticos”, “Əvilə”, “Alo Servis”, “Çayrud”, “Dəyirman”, “Suraxanı Atəşgah”, “Zülfüqar”.

5. Qeydiyyat qaydaları

5.1 Sifariş sənədləri UHFL rəhbərliyinə əvvəlcədən müəyyən edilmiş vaxtlarda təqdim edilməlidir. Sənədlər gec təqdim olunacağı təqdirdə komandalar turnirə buraxılmayacaq.

5.2 Qeydiyyatdan keçmək üçün aşağıdakı sənədlər tələb olunur:

a) Şəxsiyyət vəsiqəsinin ön və arxa hissəsinin surəti;

b) Əlavə oyunçu qeydiyyatdan keçirtmək istəyən komandalar ən gec oyundan 2 (iki) gün əvvəl bu barədə məlumat verməlidirlər.

6. Hakimlik

6.1  Turnirin oyunlarını AFFA-nın Hakimlər Komitəsi tərəfindən təyin edilmiş hakimlər idarə edəcək və hakimlik FIFA qaydaları əsasında həyata keçiriləcək.

6.2  Keçirilən hər bir oyuna 1 (bir) hakim təyin olunacaq. Hakimlərin ödənişi Təşkilatçı tərəfindən həyata keçiriləcək.

6.3  Hakimlərin oyunla əlaqəli hər hansı bir fakt və onun nəticəsi ilə bağlı qərarı, o cümlədən, intizam tənbehi tətbiq etmək, qol vurulması və ya vurulmaması saymaqla bağlı qərarı qətidir.

6.4  Hakimlər hər hansı bir xarici müdaxilə, əlverişsiz hava şəraiti, eləcə də futbolçuların və ya digər şəxslərin idmana zidd davranışlarına görə matçı dayandırmaq, təxirə salmaq və ya Təşkilatçı ilə razılaşdırmaq şərtilə, ləğv etmək hüququna malikdirlər.

7. Yarışın keçirilmə sistemi

7.1 Turnirin A və B qrupları dairəvi sistem üzrə keçirilir, daha sonra pley-off sistemi üzrə davam etdirilir.

7.2 Oyunların keçirilmə müddəti yarışın təqvimi ilə müəyyən olunur. Oyunlar iki dövrədən ibarətdir. Hər hissə 25 (iyirmi beş)  dəqiqə, hissələrdə fasilə isə 5 (beş) dəqiqədir. Oyunçuların əvəzetməsi matçın protokolunda adları göstərilmiş futbolçulardan limitsiz sayda həyata keçirilir. Meydan sahibi olan komanda protokolu birinci tərtib edir, protokolda minimum 12 (on iki), maksimum 23 (iyirmi üç) futbolçunun adı və soyadı olmalıdır.

7.4 Oyunlar minifutbol qaydalarına uyğun keçiriləcək.

7.5 Oyunlar №5 toplarla keçirilir.

7.6 Komandalar oyunun başlamasına 30 (otuz) dəqiqə qalmış oyun keçirilən meydana gəlməlidirlər.

7.7 Turnirə AFFA-nın Hakimlər Komitəsi tərəfindən təyin olunmuş hakimlərə, təhqir və ya aqressiv hərəkət edən şəxs hakim tərəfindən müvafiq qaydada cəzalandırılacaq.

7.8 Oyunun qalibinə 3 xal heç – heçə olduğu halda hər iki komandaya 1 xal verilir.

7.9 Hakim tərəfindən qırmızı vərəqə ilə cəzalandırılan oyunçu olarsa, komanda cəmi 5 (beş) dəqiqə azlıqda oynayır, 5 (beş) dəqiqə sonra hakimin qərarı ilə ehtiyat oyunçulardan biri oyuna daxil olur.

7.10 Oyun ərzində qırmızı vərəqə alan oyunçu bir daha oyuna geri dönməməli və texniki zonanı tərk etməlidir.

7.11 Artırılmış 5 (beş) dəqiqəlik hissədə hakim tərəfindən qırmızı vərəqə ilə cəzalandırılan oyunçu olarsa komanda cəmi 2 (iki) dəqiqə azlıqda oynayır.

7.12 Komandaların start heyəti 9 (doqquz) nəfərdən ibarət olur: 1 (bir) qapıçı, 8 (səkkiz) oyunçu.

7.13 Qruplardakı komandalar qrup mərhələsi çərçivəsində 18 oyun keçirməlidirlər.

7.14 Transfer pəncərəsi qrup oyunlarının birinci dövrəsindən sonra aktiv olur, ikinci dövrə başlayana qədər aktiv qalır (transfer pəncərəsi dövründə komandalar yalnız 4 transfer edə bilər).

7.15 Oyunlar təyin olunarkən hava şəraiti nəzərə alınmır, meydançanın yararlılığı barədə qərarı yalnız oyuna təyin olunmuş hakim oyun keçiriləcəyi vaxtdan ən azı 1 saat öncə qərar verir. (Bu halda oyunları təxirə salmaq hüququ hakimin müstəsna səlahiyyətindədir.)

7.16 Oyunun başlama saatında oyuna hazır olmayan komanda olarsa, həmin komandaya texniki məğlubiyyət verilir, əgər iki komanda meydançada yoxdursa, hər 2 (iki) komandaya texniki məğlubiyyət veriləcək, bu hal 2 (iki) dəfə təkrarlanarsa komandalar liqadan kənarlaşdırılacaq.

7.17 Qrup və ya pley-off oyunları  ərzində oyunlardan hər hansı birində oyun hesabına təsir edən hiylə, komandalar arasındakı hesab razılaşması aşkar olunarsa, həmin oyunun nəticəsi sıfırlanacaq və danışılmış oyunlarda iştirak edən komandalar liqadan kənarlaşdırılacaq.

7.18 Komanda kapitanlarının oyun saatını və tarixini dəyişdirmək hüququ yoxdur, oyun saatı ən azı 3 gün əvvəl məlumat verməklə və həmin gün oyunları olan digər komandalar ilə razılaşdırmaq şərti ilə dəyişdirilə bilər.

7.19 Ulduzlar liqası keçirilən meydança istismar səbəbi ilə bağlanarsa və ya başqa səbəbdən oyunlar dayandırılarsa, oyunların keçirilməsi növbəti meydançanın təyin olunma vaxtına  qədər  dayandırılacaq.

7.20 Ulduzlar Liqasında bir komanda yalnız bir ad altında təmsil oluna bilər və ad dəyişikliyi ilə bağlı istisna hal (komanda adını daşıdığı sponsorunu dəyişərsə, komanda əlavə 100 AZN ödəniş etməlidir) yaşanarsa yalnız bir dəfə üçün komanda  adının dəyişikliyinə icazə verilir.

7.21 Komandaların liqaya daxil olduqdan sonra hansısa şirkət və ya kiçik bizneslə bağlı ümumilikdə reklam xarakterli tabloları, səsgücləndirici avadanlıqları, fişəng və ya partlayıcı maddələri meydançaya gətirməsi qəti qadağandır!

7.22 İştirak ərizəsində  göstərilməyən şəxslər oyunlar keçirilən zaman meydançaya və texniki zonaya buraxılmır.

7.23 Hər bir oyunçu eyni zamanda yalnız bir komandada qeydiyyatda ola bilər.

7.24 Bir  oyunçu mövsüm ərzində maksimum iki komandada çıxış edə bilər.

7.25 İştirakçı komandalar FİFA və UEFA tərəfindən tərtib olunmuş “Fair Play” və “Respect” prinsiplərinə riayət etməlidirlər.

7.26 Komandaların xalları bərabər olarsa, turnir cədvəlindəki sıralama aşağıdakı göstəricilərə görə müəyyən olunur:

·   Komandaların öz aralarında keçirdikləri oyunların nəticəsinə əsasən;

·   Komandaların öz aralarında keçirdikləri oyunlarda vurulmuş və buraxılmış qolların sayına əsasən;

·   Bütün oyunlarda vurulmuş və buraxılmış qolların fərqinə görə;

·   Bütün oyunlarda vurulmuş qolların sayına əsasən;

·   Komandaların qələbə saylarına əsasən.

7.27 Oyun zamanı futbolçuların əvəzlənməsi aşağıdakı qaydada həyata keçirilir:

·   Oyun ərzində hər komanda limitsiz əvəzetmədən istifadə edə bilər;

·   Oyuna daxil olan oyunçu texniki zonanın qarşısında tam mərkəzdən oyuna daxil olmalıdır;

·   Oyunun baş hakimindən icazəsiz və ya qaydalara uyğun olmayan dəyişikliklər olarsa, həmin oyunçu hakim tərəfindən sarı vərəqə ilə cəzalandırılacaq;

·   Oyun zamanı əvəzlənmiş futbolçu meydançaya bir daha qayıda bilər.

7.28 Komanda 3 dəfə ardıcıl və ya ümumilikdə 5 dəfə oyuna çıxmaqdan imtina edərsə, Turnirdən kənarlaşdırılır.

7.29 Turnirdən kənarlaşdırılan komandanın bütün nəticələri ləğv edilir. (Komandanın keçirdiyi oyunların 50% nisbəti hesablanır)

7.30 Oyun ərzində komanda 4 (dörd) nəfər qaldıqda texniki məğlubiyyət verilir.

7.31 Oyun başlanar və ya bərpa olunarkən meydançanın mərkəzindən birbaşa qapıya zərbə qol kimi qeydə alınacaq.

7.32 Aut yan xəttin üzərindən ayaqla başlanılır. Bu zaman top hərəkətsiz olmalıdır.

7.33 Oyunçular idman formaları və idman ayaqqabıları ilə oyuna çıxmalıdılar, əgər idman forması yoxdursa Təşkilatçı tərəfindən fərqlənmə üçün gödəkçə veriləcəkdir.

7.34 Oyunçular stadiona butsu, eləcə də, rəqibə və ya özünə təhlükə törədəcək geyim geyinməməli və hər hansı bir təhlükəli əşya gəzdirməməlidir. Bütün növ zinət əşyası, dəri və rezin lentlər və s. istifadəsi qadağan edilir və onlar çıxarılmalıdır. Zinət əşyasının üzərini örtmək üçün yapışqan lent taxmağa icazə verilmir.

7.35 Əsas oyunçular oyuna başlamazdan əvvəl, ehtiyat oyunçular isə oyun meydanına daxil olmazdan əvvəl hakim tərəfindən yoxlanılmalıdır. Əgər oyunçu icazə verilməyən təhlükəli geyim və ya zinət əşyası gəzdirərsə hakim oyunçuya meydançanı tərk etməsi göstərişi verməlidir, əgər oyunçu etiraz edərsə top növbəti dəfə oyundan çıxdıqda, oyunçuya bir daha meydançanı tərk etməsi haqqında məlumat verilməlidir. Hakimin göstərişinə əməl etməkdən imtina edər və ya geyimdən yaxud zinət əşyasından yenidən istifadə edərsə, oyunçuya sarı vərəqə göstərilməlidir.

7.36 Komandalar bir-birindən və hakimlərdən fərqlənən geyimdən isdifadə etməlidir, hər iki komandanın geyim dəstində nömrə nişanı qeyd olunmalıdır, hər bir qapıçı digər oyunçular və hakimlərdən fərqli geyim geyinməlidir, əgər hər iki qapıçının köynək rəngi eynidirsə və onların ehtiyat köynəyi yoxdursa hakimin oyuna başlamasına icazə verilmir.

7.37 Hər iki qrupda çıxış edən komandaların balansında 1 gecikməli oyun (təxir) olduğu halda komanda növbəti təxir haqqını isdifadə edə bilməz. 

8. Meydan

8.1 Turnirin oyunları 157 nömrəli orta məktəbin meydançasında keçiriləcək.

8.2 Oyunlar keçirilən zaman turnirdə iştirak edən komandaların özlərinə mənsub azarkeşlərinin dəvət olunması və kütləvi şəkildə toplanışları  qəti qadağandır.

9. Qaliblərin müəyyən edilməsi

9.1 Yarış iki qrupdan ibarət olacaq, hər qrupda 10 (on) komanda iştirak edəcək, qruplarda oyunlar dairəvi şəkildə davam edəcək, ilk 8 (səkkiz) yeri tutmuş komanda bir başa pley-off mərhələsinə yüksələcək, daha sonra 1/8, 1/4, yarımfinal və final keçiriləcək.

9.2 Pley-off mərhələsində oyunlar heç-heçə nəticələnərsə, komandalar birbaşa penaltilar seriyasına keçid alacaqlar. Hər komanda  8 (səkkiz) metrlik 5 penalti zərbəsi yerinə yetirəcək.

9.2  Yarımfinal və final oyunlarında hesablar heç-heçə bitərsə 2 hissədən ibarət 5 dəqiqəlik əlavə vaxt oynanılacaq.

10. Cəzalar

10.1 Komandanın heyətində sifariş olunmuş oyunçulardan mövsüm ərzində saxtakarlıq aşkarlanarsa, məsuliyyəti komanda və kapitan daşıyır. Saxtakarlıq edilmiş oyunçu aşkarlandıqda, oyunçunun iştirak etdiyi bütün oyunların nəticələri ləğv edilərək komandaya texniki məğlubiyyət verilir.

10.2 Oyun ərzində qırmızı vərəqə alan oyunçu bir daha oyuna daxil olmur və 1 tur cəzalanır.

10.3 Təhqir, söyüş, qeyri-idman hərəkəti göstərərək qırmızı vərəqə alan oyunçular hakim tərəfindən 1-8 oyun cəzası ala bilər və yaxud Təşkilatçı tərəfindən turnirdə iştirakının dayandırılması barədə qərar qəbul edilə bilər.

10.4 Oyun ərzində 2-ci sarı vərəqədən sonra qırmızı vərəqə alan oyunçu komandasının növbəti oyununda cəzalı vəziyyətə düşəcək və növbəti oyunda iştirak etməyəcək.

10.5 Qrup ərzində ümumilikdə 3 sarı vərəqə alan oyunçu komandasının növbəti oyununda iştirak etməyəcək.

11. Peşəkar oyunçu limitləri

11.1 Qeydiyyatdan keçən peşəkar oyunçu Azərbaycan Premyer Liqası və Birinci Divizionunda sonuncu dəfə  2018-2019-cu il mövsümündə  iştirak etmiş olmalıdır.

11.2 Futzal üzrə Yüksək Liqada aktiv fəaliyyəti olan oyunçunun iştirak etməsi qəti qadağandır.

11.3 Hər komanda üzrə futzal üzrə Birinci Liqada iştirak etmiş 5 (beş) nəfərin, İkinci Liqada iştirak etmiş limitsiz sayda oyunçunun iştirakına tam icazə verilir.

12.  Təhlükəsizlik və Sağlamlıq

Oyunlar keçirilən zaman oyunlarda həkimin iştirak etməsi, oyunlara həkimin cəlb edilməsi, təhlükəsizliyin təmin edilməsi Təşkilatçı tərəfindən həyata keçirilir.

13. Mükfatlandırma

13.1 Turnirin qalibləri müxtəlif hədiyyələr ilə mükafatlandırılacaqlar.

13.2 Final mərhələsində ilk 3 (üç) yeri tutan komandaların oyunçuları və məşqçiləri müvafiq olaraq birinci, ikinci, üçüncü yer medalları ilə təltif olunacaq, 1-ci yer kubok və medallar, 2-ci və 3-cü  yerlər Təşkilatçı tərəfindən medallarla təltif olunacaq.

13.3 Turnirdə bombardir, ən yaxşı qapıçı, ən yaxşı oyunçu, ən yaxşı müdafiəçi, ən yaxşı hücumçu, ən çox  məhsuldar ötürmə sahibi seçilərək Təşkilatçı tərəfindən dəyərli hədiyyələr ilə mükafatlandırılacaqlar.

14. Xüsusi şərtlər

14.1 Turnirdə iştirak edən komandalar iştirakçıların şəxsiyyət vəsiqələrinin surətini (hər iki tərəf) turnirin qeydiyyata alınması üçün yarış başlamazdan 1 gün əvvələdək AFFA-nın Kütləvi Futbol departamentinə təqdim etməlidirlər. Əks təqdirdə AFFA tərəfindən oyunlara hakim təyinatı dayandırılacaq.

14.2 Turnirdə oyunlar zamanı AFFA-nın İntizam Komitəsi tərəfindən sanksiya tətbiq edilmiş (AFFA bayrağı altında təşkil olunan yarışlarda iştirakdan məhrum edilmiş) oyunçular aşkarlanarsa, oyun hakim tərəfindən ləğv ediləcək və həmin komandaya texniki məğlubiyyət veriləcəkdir.